Mir Memminger

Mir Memminger send, wia ma send ,
ons muaß ma schon so lau.
Anschtatt an „Kopf“, hand mir an „Grend“,
weil mir vo Memminga halt send,
i ka des guat verschtauh.
Wenn andre „stehen“, mir tond „schtauh“,
mir send dau it do nobl.
Ond wenn se “gehen”, mir tond “gauh”,
mir kennets zwar au bleiba lau,
da geit´s bei ons koin Hobl.
Schtatt „setzen“, „hocket“ mir ons na,
schtatt „liegen“ tond mir „flacka“.
So Gmüetsausdrück, dia reget a
ond denksch dau in d´r Fremde dra,
dau muaß di´s Hoiweh packa.
Dia fremde Leut hant oft a Gschroi,
went us d´r Haut schier fahra,
wenn mir tond saga nauch d´r Roih:
Katz hocket am Kreatle uf d´r Boi,
foikt mit ma Poppl Gara.
Ond wenn ons mancher holprig fendt,
mir hant koin schleachta Kera:
Wo´s Land durchbraust a solcher Wend,
wo´d Felder gar so bucklet send,
wia soll dau d´Menschheit wera.
Mir send wia onser Iller isch,
beim Sonnaschei so mild.
Ond wir se aschwillt mit Gezisch,
wenn grad d´r Hemmel schtürmisch isch,
send koldrig mir ond wild.
Mir Memminger send, wir ma send,
ons muaß ma scho so lau.